Grashoppene

Grashoppegruppa består i år av 14 kjekke små. Dei er 8 gutar og 6 jenter, født i 2021 og 2022.
Dei er ein sprudlande og travel gjeng som engasjerer seg lett i leiken og i ulike aktivitetar.
Saman har me innhaldsrike dagar med spanande samlingsstunder, arbeid med tema og mykje frileik!

Grashoppene trivest godt ute og har mykje fantasi i uteleiken. Her kan me være konge på toppen av klatrestativet, kjøre båt til spanande destinasjonar og arrangere selskap med kaker frå sandkassen. Er det regn og vått så er sølepyttar toppers, då samlast gjengen rundt dammane og alle skal få plass.
Me arbeider heile vegen med samarbeid, inkludering og det å dele og byte på tur.

På morgonane går me gjennom dagstavla slik at barna er førebudd på det som skal skje den dagen.

Tysdag har me turdag og det er alltid stas! Då står dei klar på rekkje ved porten så fort dei kjem ut og ventar på å få på refleksvesten sin. Turar me likar godt er leirplassen vår i skogen og området rundt museet. Til lunsj har me med oss heimalaga suppe på termos med grov focaccia eller heimalaga krutongar.

Me gler oss til å ta fatt på eit nytt barnehageår saman med denne kjekke gjengen!