Sommarfugl

Sommarfuglane er den eldste gruppa i barnehagen, og til hausten skal dei byrja på skulen. I år er me gjeng på 20 barn og 4 vaksne. Dei vaksne på gruppa er Vigdis, Kine, Hilde og Karoline. 

Nokre føremiddagar er me inne og andre dagar går me på tur. Når me går på tur likar me godt å gå på tur i skogen og finne oss ein kjekk plass å leike og la fantasien få utfalde seg. Me klatrar, balanserer og brukar kroppen i aktiv leik. Rolleleiken er også spennande ute i naturen. Me likar oss godt i skogen på Føyno, i skogen i skulehagen og i Landåsen/Skjepåsen. Me har nemleg ein liten buss i barnehagen, så når det er vår tur til å ha bussen kjem me oss litt lengre vekk og kan gå på tur andre plassar og kan utforske fjell, strender og andre skogar lengre vekke. Det er spennande. Når me er ute i barnehegan er det kjekt å sparke fotball, sykle, lage butikk, leike i sandkassen og ikkje minst leike med vatn.  

Me har og ein eigen leirplass i barnehagen vår, og her likar me oss godt. Den ligg berre eit steinkast fra barnehagen så her kan me gå ofte. Her har me både tauleiker, bålplass og masse kjekk skog og boltre oss i. No kan me snart jakte på vårteiken og sjekke endringane i skogen. Det er spennande å sjå naturen vakne til liv etter vinteren. Undre og utforske er noko me held mykje på med, det er så mange ting å finne ut av. 

På dagane me er inne likar dei godt å teikne, pusle, spele, leike rolleleik og ulike typar konstruksjonsleik. Kjøkkenkroken er veldig populær, og der er rolleleiken veldig sentral. Her serverer dei dei lekraste rettar med både cupcakes og iskrem, og ofte har dei ein kaffikopp til dei vaksne og. Sommarfuglane har mykje dei er opptekne av og likar godt å lære nye songar, rim og regler. Me les mange kjekke bøker saman i samling, både morosame og alvorlege bøker. Ein gong av og til vert det kino i konferanserommet, det er alltid stor stas. Dagar med innhald og dagar med gode opplevingar er viktig, me på sommarfugl har det kjekt saman og trivest godt i barnehagen vår.